Në këtë ditë, para nëntë vitesh Messi u bë lojtari i parë që shënoi pesë gola në një ndeshje në Ligën e Kampionëve

Sport

Një Lionel Messi i pandalshëm bëri historinë duke u bërë lojtari i parë ndonjëherë që shënoi pesë gola në një lojë të Ligës së Kampionëve, nëntë vjet më parë në këtë ditë (7 mars).
7 marsi i vitit 2012 ishte i veçantë për Messin, por edhe për botën e futbollit.

Kjo pasi u arrit një rekord i madh, me një lojtar që arrin së pari herë të shënojë plot pesë gola brenda një ndeshje të Ligës së Kampionëve.

Bayer Leverkusen ishte viktima e asokohe 24-vjeçarit Messi, teksa Barcelona fitoi 7-1 në Camp Nou.

Golat e yllit argjentinas erdhën në minutat 25’, 42’, 49’, 58’ dhe 85’, duke bërë që trajneri i Barcelonës në atë kohë, Pep Guardiola, të zgjedh fjalët më të mira.

“Sonte jemi dëshmitarë të një prej netëve më të veçanta të Lionel Messit. Të shikosh atë ishte si të marrësh një dhuratë”, kishte deklaruar Guardiola.
Ndryshe, Messi ka plot 119 gola në histori të Ligës së Kampionëve dhe gjendet i dytë në listë, pasi Cristiano Ronaldo është i pari me 134 gola. /Telegrafi/