Kurti e Osmani bashkohen për ta rrënuar “murin e madh të korrupsionit”

Kosova Lajme

Prestigjiozja britanike “The Guardian” ua ka kushtuar një shkrim zgjedhjeve në Kosovë, në theks të veçantë bashkimit të forcave mes Albin Kurtit dhe Vjosa Osmanit në zgjedhjet e 14 shkurtit, transmeton “Zeri.info”.
Shkrimin e plotë të “The Guardian” mund ta lexoni pa ndërhyrje më poshtë:
Një aleancë e re politike është mënyra e vetme për të luftuar një “mur të madh të korrupsionit” në Kosovë, kanë thënë kandidatët kryesorë për kryeministër dhe president përpara zgjedhjeve që mbahen këtë të diel dhe që për herë të parë mund të ndodhë të fitojë shumicën një parti e vetme prejse shteti i Ballkanit shpalli pavarësinë.

Bashkimi midis Albin Kurtit për kryeministër dhe Vjosa Osmanit për presidente po rezulton i popullarizuar në sondazhe, teksa fushatat e furishme dhe tubimet që tregojnë pak shenja të respektimit të rregullave të distancës sociale po hyjnë në javën e fundit para votimit të 14 shkurtit.
Kurti dhe Osmani vijnë nga tradita dhe parti të ndryshme, por kanë thënë se ata kanë një vendosmëri për t’i dhënë fund kapjes endemike të shtetit nga një elitë e korruptuar.

Kurti vjen nga e majta dhe është shumë i përqendruar në punë dhe drejtësi, veçanërisht për të rinjtë. Gati gjysma e Kosovës është nën moshën 30 vjeç.
Ai u bë i njohur si një aktivist studentor me flokë të gjata në fund të viteve 1990, duke demonstruar kundër shtypjes në rritje ndaj shqiptarëve të Kosovës nga Serbia e Slobodan Milosheviqit. Ai udhëhoqi protestat studentore në Universitetin e Prishtinës, punoi për krahun politik të Ushtrisë Çlirimtare të Kosovës dhe u burgos nga regjimi i Milosheviqit për gati tre vjet.
Tani i veshur me kostum dhe me flokë të prera, ai këmbëngul se nuk e ka humbur vendosmërinë e tij.

“Është më mirë të shkosh përpara edhe pse vuan një vdekje gati sa epike, sepse do të kesh shansin për ringjallje. Më mirë kështu sesa të qëndrosh në pushtet me çdo kusht me kompromise dhe koncesione për të gjithë”.